تهحسین ناڤشكی
* ناڤێ ب دورستی (تهحسین خیروللا عهبۆ) یه، ناسیاره ب (تهحسین ناڤشكی)، ل زڤستانا سالا ١٩٦٨ ل گوندێ ناڤشكێ، ل رۆژ ئاڤایێ باژێركێ مانگێشكێ نێزیكی سینۆرێ كوردستانا باكوور ژ دایك بوویه. خێزانداره و سهمیانێ چوار كوڕ و كچهكانه.
* ل سالا ١٩٧٤ ل ناڤبهرا گوندێ ئۆزمانا و ناڤشكێ دهست ب خواندنا خوه كرییه و د ههمان دهم ده؛ وهك فهقی ل مزگهڤتا گوندی خواندییه.
* خواندنا خوه یا ناڤنجی ل سالا ١٩٨٣ ل ناڤبهرا باژێڕكێ مانگێشكێ و باژێڕێ دهۆكێ ب داوی ئینایه.
* خواندنا مامۆستایهتییێ ل پهیمانگهها مامۆستایان ل سالا ١٩٨٦ ل باژێڕێ دهۆكێ ب داوی ئینایه.
* ل سالا ٢٠١٩ خواندنا خوە ل کۆلیژەیا پەروەردا بنیات – پشكا پهروهرده و دهرووناسى ب دوماهی ئینایە، پشتى بهتر ژ ٣٠ سالان ژ ههمان پشكا خواندنا بلند بێبههربوویڵى ژ ئهنجامێ دهستههلاتا دكتاتۆرى یا حوكم ههتا سالا ٢٠٠٣ ل ئیراقێ دكر.
* ل سالا ١٩٨٥ كانییا وی یا ئهدهبی پهقییه و ل دهستپێكێ شعرا كلاسیكی نڤیسییه. ل قۆناغا بهری سهرهلدانا، ئێكهمین شعرا وی ل سالا ١٩٨٩ ل رۆژنامهیا هاوكاری بهلاڤبوویه. پشتی هینگێ بهرههمێن وی یێن شعری و ئهدهبی و رهوشهنبیری ل بهلاڤۆكێن (بهیان، بزاڤ، پاشكۆی ئیراق و بهلاڤكۆكێن دن ) بهلاڤبووینه.
* پشتی سهرهلدانا گهلێ مه ل بهارا ١٩٩١ ههر ل سهر كارێ خوه یێ نڤیسكارییێ یێ بهردهوامبوویه و بهرههمێن وی ل گهلهك بهلاڤۆكێن ههرێما كوردستانێ وهك: (پهیمان، مهتین، نووخوازی، ریگای سۆسیالیزم، سهرهلدان، برایهتی، رامان، پهیڤ، گازی، نووبوون، ئهڤرۆ، بههدینان، چاڤدێر، هاوهلاتی، ئاوینه، ههرێم، سیلاڤ و رۆژنامهیا وار. هتد) بهلاڤبووینه. نوكه ژی ئهندامه د ئێكهتییا نڤیسهرێن- كورد دا-دهۆك. ههر وهسا ئهندامێ كارایه د رێكخراوا رۆژنامهڤانێن كوردستانێ دا- زێده باری وهرگرتنا ئهندامهتییێ د رێكخراوا رۆژنامهڤانێن جیهانێ دا.
* یا ههژی گۆتنێ یه، ههر دگهل نڤیسینا شعرێ دهست ب نڤیسینا چیرۆكێ و بابهتێن رۆژنامهڤانی ژی كرییه. ههر وهسا بۆ دهمێ ههشت ساڵان وهك پهیامنێرێ ههفتینامهیا (پهیمان) ل دهڤهرێن مانگێشكێ و زاویته كار كرییه.
* ژ سالا ٢٠٠٧-٢٠٠٩ ئهندامێ دهستهكا كوڤارا پهیڤ بوویه. لسالا ل ٢٠٠٩/١٠/١ دگهل هندهك ههڤالان رۆژنامهیا وار وهك دهستپێكا كۆمپانیا پالۆ یا رهوشهنبیرى و راگههاندنێ دامهزران و وهك رێڤهبهرێ نڤیسینێ ههتا ل ٢٠١٥/١٠/١٥ رۆژنامه هاتییه گرتن لسهر كارێ خوه بهردهوام بوویه.
* نها ژى لسهر كارێ خوه یێ نڤیسكاریێ و راگههاندنێ ل تێلەڤزیۆنا پەروەردەیا دهۆک بهردهوامه، پشتی ١٦ سالان کارێ مامۆستایێ ل هندەک قوتابخانەیێن بنەڕەتی کری و ١٢ سالان کارێ راگەهاندنێ ل پەروەردەیا رۆژئاڤا ل دهۆکێ کری.
* ل سالا ١٩٩٩ دهست ب نڤیسینا ئێكهمین رۆمانا ههڤچهرخ ب ناڤێ (بهههشتا ئاگرى) كرییه.
* پرتووكێن وی یێن چاپكری ههتا نها ئهڤه:
١- ڤهدانا پێلێن مژێ ڤهكۆلینێن وێژهیی ل سهر توخمێ ههلبهستا ههڤچهرخ ل دهڤهرا بههدینان. ل سالا ٢٠٠٠ چاپبوویه.
٢- چلخانه، شعر، ٢٠٠٢
٣- خوهنیشاندانا قهرقۆدان، شعر، ٢٠٠٤
٤- ژانێن سیناهییێ، رۆمان، ٢٠٠٥
٥- چاڤێ سیتاڤكێ، رۆمان، ٢٠٠٧
٦- دهولهتا دارستانێ، نۆڤلێت بۆ زارۆكان، ٣٠٠٨
٧- پهل و خولی، رۆمان، ٢٠٠٩
٨- ئالێ دی یێ پرێ، ڕۆمان، ٢٠١٠
٩- بهههشتا ئاگرى، بەرگی یەکەم، بەرگی دووەم، ٢٠١١
١٠- تاڤگه، یان لێگهرِیان ل رۆناهییا پرا جینۆتێ، ٢٠١١
١١- چاڤێ سێیێ، كورته چیرۆك، ٢٠١٣
١٢- دەولەتا ئیسرائیلێ، ژ نڤیسینا تیۆدۆر هرتزل، رۆمان، وەرگێڕان، ٢٠١٩
١٣- ئیڤلین، یان زڤڕینا ئەشتارێ، رۆمان، ٢٠٢٠
١٤- تاخێن خودێ، رۆمان، ٢٠٢١
١٥- گوڕلیس، شەمهەرۆزی ئەجنە، رۆمان، ٢٠٢٢
١٦- ئەڤینی د فیشەکا بی کەی سی یێ دا، رۆمان، ٢٠٢٢
١٧- جوونێن هونەرێ ڤیانێ، ئێرێک فرۆم، وەرگێڕان، ٢٠٢٣
١٨- ئەنتیجاش، ڕۆمان، ٢٠١٣
١٩- پەڕکانێ و گوستیرا ئەفریتی، شانۆنامە، ٢٠٢٣
* نها كۆمهكا پرتووكێن دن هەنه ژ بوو چاپكرنێ بهرههڤن، ژ وانا ٣ رۆمانن ب شێواز و ناڤەرۆکێن نوو هاتینە نڤیسین.
QR Kod: